نكت عامة

ماساج

هادا واحد الراجل دخل للدار ولقى مرتو ما وجداتش ليه العشا
الراجل كعا بزاف و طلع الدم، ودخل البيت وسد عليه
مرتو باش تحزرو، مشات عندو وقالت ليه: ندير ليك ماساج؟
قال ليها: والله وديريه حتى نلوحو ف الزبل

كلب جاعر
واحد شرا بارابول بالتخبية من دارهم وخباه ف السطاح، وقال ليهم: حتى واحد ما يطلع للسطاح، راه شريت كلب كبير و جاعر.
ناض خوه طلع للسطاح باش يشوف أشنو كيان، وملي نزل جا كيجري ومخلوع.
سولوه: شفتي الكلب؟
قال ليهم: لا، شفت غير الطبسيل فاش كياكل

بوراس كبير
هادا واحد خينا راسو كبيييييييير ركب في الطوبيس، وبقا كيغني أغنية ديال الدراري الصغار وتيميل براسو على ليمن ... وعلى ليسر ...
(عندي بااااااااابا ... وعندي ماااااااااااااما ... ديما معاااااايا ... حتى في النوووووووووم)
ملي كان الطوبيس غادي، واحد البوليسي حبس الشيفور ديال الطوبيس ...
قال ليه: عندك 400 درهم خطية
الشيفور: علاش؟ ياك لاباس؟
البوليسي: راه الطوبيس تيميل على ليمن وعلى ليسر
الشيفور كعا وسب هاداك خينا اللي راسوا كبير
صاحبنا بو راس كعا حتى هو ...
قال ليه: ياك؟ كتعايرني؟ واخا!
غا زاد الطوبيس شوية وبدا بوراس كيغني ليه أغنية
الكناوي ناوي ناوي ... الكناوي يا سادتي)

خبز كارم
هادا واحد ديما كيمشي عند مول الحانوت كيقول ليه: عندك خبز كارم؟
كيقول ليه مول الحانوت: لا.
بقاو على هاد الحال شحال، واحد نهار فكر مول الحانوت وقال: اليوم غادي نوجد ليه خبز كارم.
جا عندو هاداك الراجل، قال ليه: عندك خبز كارم؟
هاد المرة قال ليه مول الحانوت: كاين
وهو يقول ليه: ماغاديش يتباع ليك

بيستاش
هادا واحد بغى يشري بيستاش وما عرفش سميتو
مشى عند مول الحانوت وقال ليه: عطيني كاوكاو اللي كيضحك

العرس وإلا فلا
هادا واحد مشى لواحد العرس وما هداش على الماكلة حتى هزوه للسبيطار
مللي وصلا لقاو واحد لابيانص أخرى يالله وصلات
سولهوم هاداك الراجل للي كلا بزاف: مال هاد خينا مسكين؟
قالوا ليه: كان ف شي عرس و ما حبس الماكلة حتى مات
قال ليهم هاداك الراجل: إيوا هاداك هو العرس وإلا فلا

نلعب البيانو
هادا واحد الراجل سول الطبيب ديالو: دكتور، واش غادي نقدر نلعب البيانو من بعد ما ندير هاد العملية؟
قال لي الطبيب: أكيد
قال ليه الراجل: مزياااااااان. حيت ماعمرني كنت نعرف نلعب البيانو من قبل

التفرتيت
قال ليك هادا واحد مشى عند مول المحلبة وقال ليه: بشحال التفرتيت؟ قال ليه مول المحلبة: فابور
قال ليه خينا: إيوا فرتت ليا عافاك واحد تلاتة ديال ميل فوي
(millefeuille)

النمرة غلط
هادي واحد البنت نص ساعة وهي كتهدر ف التلفون.
مللي سالات قالت ليها ختها: على سلامتك! كي درتي ساليتي ف نص ساعة؟ عادة كتشدي التلفون ساعتين
قالت ليها البنت: اه، راه غير النمرة غلط

بورطابل وبورطابلة
هادا واحد البورطابل دار مع واحد البوطابلة باش يتلاقاو، ساعة تعطل عليها
قالت ليه البورطابلة: أش هاد التعطيلة؟
قال ليها البوطابل: واحق الريزو اللي بناتنا إيلا غي كنت كنتشارجا

ما بقاتش بلاصة
هادا واحد مشى لواحد العرس و بدا ياكل ياكل ياكل حتى بغات كرشو طرطق
قالوا ليه: أدير صبعك ف فمك باش ترد
قال ليهم: كون بقات بلاصة فين ندير صبعي كون كليت مازال بنانة

دلعني
واحد المرا قالت لراجلها: دلعني!
قال ليها: انتي قمرة
قالت ليه: انت شمش
قال ليها: انتي لؤلؤ
قالت ليه: انت ألماس
قال ليها: انتي مشة
قالت ليه: انت كلب
قال ليها: انتي طااااااااااااااااااااالق

ما تحركش حتى نجي
هادو شي رجال جالسين ف القهوة، ناض واحد قال ليهوم: اللي كيخاف من مرتو ينوض يجلس اللور.
ناضوا كاملين إلا واحد. سولوه: نتا ما كاتخافش من مرتك؟
قال ليهوم: راه قالت لي سير للقهوة وما تحركش حتى نجي

الصدى
هادا واحد الولد طلع للسطاح ولقى جداتو كتغسل شعرها من الحنا.
هو غير شاف اللون ديال الما قهوي وهو يقول ليها: شفتي أجدة أشنو كنقول ليك ديما؟ ها راسك تصدى كاع من كترة الجليس ف السطاح

خال أولا خالة
هادا واحد مشات ختو تولد وشداتو الخلعة وتالف. سولوه: أشنو غادي يتزاد عندكوم؟
قال ليهم: إيوا هاد الساعة مازال ما عرفت واش غادي نولي خال أولا خالة

يا ملاكي
واحد الولد سول ماماه: ماما، أشنو كيعني ملاك؟
قالت ليه ماماه: الملاك مخلوق من نور وكيطير.
قال ليها الولد: وعلاش قال بابا للسكريتيرة ديالو يا ملاكي؟
قالت ليه ماماه: ما ديرش ف بالك، من غدا غادي تطير

مبارك الحولي
واحد الراجل سميتو مبارك، شرى حولي ودخل بيه الدرب
شافتو جارتو من الشرجم، وقالت ليه: مبارك الحولي
قال ليها: خدوج النعجة

والسيكان؟
هادي واحد المرا بغات تركب طاكسي وهي تسول مولاه: بشحال أولدي كتدي لحي المقاومة؟
قال ليها: 15 درهم
قالت ليه: والسيكان؟
قال ليها: السيكان فابور
قالت ليه: إيوا هاك أولدي دي ليا هاد السيكان هاني غادي نلحق بيك على رجلي

كتكوت مفترس
هادا واحد عندو واحد الكتكوت مفترس. كيديرو مع الدجاج كياكل ليه الدجاج. دارو مع الحوالا خرج ليه على الحوالا. دارو مع البقر، لقاه فرتك ليه البقر. الراجل طلع ليه الدم وهي يدي داك الكتكوت رماه ف الصحرا
مللي دازو 3 ايام، الراجل بقى فيه الكتكوت قال يمشي يطل عليه. مللي وصل للصحرا لقاه مرمي ف الرملة والنسور كيحومو عليه. جرا عندو الراجل وقال ليه: مييييمتي الكتكوت ديالي مات
قال ليه الكتكوت : الله يعطيك الويل خرجتي ليا على البلان

عند الحلاق
هادا واحد عندو تلاتة د الشعرات ف راسو. مشى عند الحلاق وقال ليه: دير ليا فرقة من الجنب
الحلاق جا يدير ليه الفرقة من الجنب تقطعات ليه واحد الشعرة
قال ليه الراجل: واخا دي ليا الفرقة ف النص
الحلاق جا يدير ليه الفرقة ف النص تقطعات ليه شعرة أخرى
قال ليه الراجل: عرفتي أشنو تدير؟ دير ليا تشويكة