نكت مدرسية

*خمسة د الحيوانات
هادا واحد التلميد قال ليه المعلم: عطيني خمسة ديال الحيوانات
قال ليه التلميد: بقرة و كلب و تلاتة ديال الحمامات

*ممحاة ديال ستاشرمية
هادا واحد المعلم تعين ف واحد لقرية ف لعروبية. واحد النهار دّا الكاشير للقسم و سول التلاميد: ما هذا؟
حتى واحد ما قشع أشنو داكشي. شوية و هو يهز واحد التلميد صبعو: هاديك ممحاة ديال ستاشرمية

*التراكتور
هادي واحد المعلمة رسمات للدراري تراكتور و سولاتهم واش عرفوا أشنو سميته.
حتى واحد ماعرفه. واحد شوية وهي تنوض واحد باش يجاوب و الدري تمتام، قال ليها: تر تر تر تر تر تر
وهي تقول ليه: أنا غير سولتك على سميته ماشي قلت ليك دير ليه أمارش

*التلاميد والفرنسية
واحد الأستاذ ديال الفرنسية سول التلاميذ ديالو: أشنو كيعجبكم فـي الفرنسية ؟
واحد قال ليه: اكسبريسيون اكريت
Expression écrite
التاني قال ليه: اكسبريسيون أورال
Expression orale
نقز الكسول قال ليه: غاماصي ڤو زافيغ
Ramassez vos affaires

*الكعية ديال بصاح
هادا واحد الاستاد قال للتلاميد دياولو: غادي نوريكوم تلالة د الانواع ديال الكعيات
اتصل بواحد النمرة وجاوباتو واحد البنت قال ليها: كاين عمر؟
قالت ليه: لا ما كاينش، النمرة غلط
قال للتلاميد: هادي كاعية
اتصل تاني بنفس النمرة وجابواتو نفس البنت وقال ليها: كاين عمر؟
قالت ليه: قلنا ليك ما كاينش مالك مصدعنا
قال للتلاميد: هادي كاعية كتر
عاود اتصل بنفس النمرة وجابواتو نفس البنت وقال ليها : كاين عمر؟
قالت ليه:ما كاينش ألحمار وما تبقاش تعيط
قال للتلاميد: هادي كاعية بزااااااااااف
ناض واحد الولد قال ليه: أنا غادي نوريك الكعية ديال بصاح
ناض عيط لنفس النمرة وقال ليها: أنا عمر، عيط ليا شي واحد؟

*دمدومة مطور
هادا واحد المعلم قال للتلاميد دياولو: سولوني أي سؤال وإيلا ما عرفتش نجاوب عليه نعطيكم 100 درهم، وإيلا سولتكوم أنا سؤال وما عرفتوش تجاوبوا عليه عطيوني 50 درهم
الدراري تخلعوا حتى من المجتهدين. شوية ناض الدمدومة ديال القسم رفع صبعو وفرع للمعلم راسو حتى خلاه يهدر، قال ليه المعلم: زيد كاع أشناهو السؤال ديالك؟
قال ليه الكسول: أشناهي الحشرة اللي عندها 9999 رجل؟
المعلم عيا ما يفكر ما عرفش الجواب. وهو يعطي للكسول 100 درهم كيفما اتافقو
ناض المعلم سول الكسول: يالله قول لينا نتا أشناهي هاد الحشرة اللي عندها 9999 رجل؟
قال ليه الكسول: والله أودي ما عرفت، وهو يعطي للمعلم هاديك 100 درهم وقال ليه: هاك هادي، خود 50 درهم ورد علي 50 درهم ديالي

*سبيل سلسبيل
واحد المعلم سول التلاميد: أشنو المعنى ديال كلمة سبيل و أشنو المعنى ديال كلمة سلسبيل
جوابه واحد التلميد: سبيل هو طريق و سلسبيل هو طرطريق

*سلموا عليك
هادا واحد مسيفط ختو تشوف ليه النتائج ديال الامتحانات. اتفق معاها تقول ليه ف التلفون إيلا سقط ف مادة وحدة: سلم عليك محمد. إيلا سقت ف جوج مواد: سلموا عليك محمد و محمد. إلخ
المهم مشات البنت تشوف النتائج وعيط ليها خوها، قال ليها: أ من درا؟ قالت ليه ختو: سلمت عليك أمة محمد كلها

*ضرب الولد الصرصور
واحد الاستاد قال لواحد التلميد: أعرب لنا جملة "ضرب الولد الصرصور"
جاوبه الولد: ضرب فعل إجرام، الطفل ابن حرام، أما الصرصور فهو فاعص مفعوص وعلامة فعصه الضربه القاضيه على رأسه

*ضفدعتعشر
واحد المعلم رسم للتلاميد ضفدعة و حداها 1 ف السبورة و قال ليهم يقراو ليه أشنو داكشي. شي قال (واحد ضفدعة). شي قال (ضفدعة واحدة) .ما خلاو ما قالوا حتى عياو و هو ينوض واحد الكسول و قال ليه: هاديك
ضفدعتعشر

*الكوكب المراكشي
هادا واحد الاستاد سول التلاميد دياولو :ما هو أقرب كوكب إلى الأرض؟
حتى واحد ما عرف يجاوب. شوية و هو يهز واحد الكسول إيديه: "استاد، استاد، استاد
قال ليه جاوب
جاوب الكسول: الكوكب المراكشي

*النجمة بالفرنسية
واحد الاستاد ديال الفرنسية سول التلاميذ دياولو: أشنو هي النجمة بالفرنسية؟
واحد التلميذ عرفها ولكن حشومي، وقالها لصاحبو الكسول. داك الكسول هز صبعو وقال للاستاذ: ليطوال
L'étoile
تعجب الاستاذ من هاداك الكسول وقال ليه: ركبها في جملة مفيدة.
جاوبو الكسول: اللي طوال يرجعو اللور، واللي قصار يزيدو القدام
*تساوي الحرب
أستاد ديال الرياضيات سول واحد التلميد: إيلا عطاك باك 10 د الدراهم و عطا لخوك 15 دراهم. ماذا تساوي؟
قال ليه التلميد: تساوي الحرب

*جي نتا اللول
هادا واحد غير دخل الامتحان ديال الباكالوريا و دغية خرج.
قالو ليه: مالك خرجتي دغية؟
قال ليهوم: قال ليا الوالد جي نتا اللول

*حاس براسو مكلخ
واحد المعلم قال للتلاميد دياولو: اللي حاس براسو مكلخ يوقف
سكتوا التلاميد كاملين إلا واحد ناض وقف
قال ليه المعلم: حاس براسك مكلخ؟
قال ليه التلميد: لا، غير ما بغيتكش تبقى واقف بوحدك

*عزيز على المعلمة
واحد المرا سولات ولدها: واش نتا عزيز على المعلمة ديالك؟
قال ليها الولد: أه أماما، أنا بوحدي اللي كتقول ليا غادي تبقى معايا العام الجاي

علاش تعطلتوا؟
هادو 2 دراري تعطلوا على المدرسة. سولهم المعلم : علاش تعطلتوا؟
قال ليه واحد: راه طاحت ليا 10 د الدراهم.
و هو يسول المعلم التاني: و نتا مالك؟
قال ليه لاخور: راه كنت داير رجلي عليها.

*علاش تعطلتي؟
واحد المعلم سول التلميد: علاش تعطلتي؟
قال ليه الولد: واحد الراجل كان كيقلب على 100 درهم ديالو
المعلم: مزيان، هي كنتي كتعاونو يقلب عليها
التلميد: لا، كنت حاط رجلي عليها

*كسول جاه كلاكاج
نكت مغربية - نكت المدرسة
إرسال إلى صديق
تقييم المستخدمين: / 50
سيئجيد
هادا واحد لكسول، غير هز صبعو و هو يشدو لكلاكاج

*كيتبسل عليا
هادي واحد البنت وصلات المدرسة معطلة
قال ليها الاستاد: مالكي تعطلتي؟
قالت ليه: راه واحد كان كيتبسل عليا و تابعني
قال ليها المعلم: إيوا إيلا كان شي واحد تابعك غادي توصلي دغية ماشي تعطلي
قالت ليه: راه هو اللي كان كيتمشى بشوية

*نتائج المدرسة
هادا واحد الولد ساقط ورا النتيجة ديالو لباه. عطاه باه قتلة ديال العصا وقال ليه يا الكسول أشنو كنتي كتدير ملي كانو قرانك كيقراو
منين كمل معاه جات نوبة خوه. ورا لباه النتيجة اللي مكفسة بحالها بحال ديال خوه. شاف فيها باه وهو يقول ليه: سير أولدي الله يهديك، ولكن العام الجاي خاصك تدير حسن من هاكا.
الولد اللي كلا العصا بغى يحماق ما فهمش القضية كيدايرة. وهو يسول خوه: كيفاش زعما بجوجنا ساقطين وأنا ناكل العصا ونتا لا؟
قال ليه خوه: حيت حطيت ليه مية درهم ف وسط النتيجة

*نضغ نضغ
واحد المعلم عزيزعليه يسلخ الدراري. شد واحد الولد وسولو: باش تغديتي اليوم؟
جاوبو: بالمرقة. هز المعلم العصا وبدا يضرب فيه: ها البطاطا، ها خيزو، ها اللفت، ها اللحم، ها البصلة... حتى شبعو عصا
داز على التلاميد كلهم حتى وصل عند واحد العايق سولو: باش تغديتي؟
هو يقول ليه: بمسكة
وقف المعلم شوية يفكر، وهز العصا حتى السما هو يعطيه: ها الكاغيط الفوقاني، ها الكاغيط التحتاني، ها نضغ نضغ نضغ نضغ

*نفرح الدراري
هادي واحد الطلابة قالت لواحد المعلم: الله يرحم الوالدين عطيني باش نفرح الدراري
قال ليها: سيري قولي ليهوم راه ما كايناش القراية غدا

*نفس الشعور
واحد المعلم ضرب واحد الولد كيقرى عنده و قال ليه: راه غير عزيز عليا، داكشي علاش كنضربك إيلا ما درتيش التمارين
قال ليه الولد: كون غير قدرت نبادلك نفس الشعور

*نكتة الصفر
هادا واحد الأستاد نوض واحد الكسول للسبورة، و كتب ليه صفر و سولو: أشنو هادا؟
جاوبو الكسول: صفر
زاد ليه الأستاد تلاتة ديال الأصفار, و عاود سولو: و دابا؟
جاوبو الكسول: صفرالاف و صفرمية و صفرة و صفرين

* يعيش السمك في الماء
الأستاذ: يعيش السمك في الماء.
التلميذ: يعيش يعيش يعيش